FUO Students Dey Cry Over 50 Per Cent School Fees Increase

[Abigail pereowei]

Students for Federal University, Otuoke (FUO) dey vex well well because management don increase school fees by 50 per cent.

Dem increase di fees reach N78,500 for non-science students, N90,500 for science, N107,500 for medical science and N100,500 for law students.

Di Students Union Government (SUG), wey Comrade ZoloTolomokizee dey lead, meet wit management and gree for small reduction.

Dem reduce N9,000 for non-science students, N11,000 for science students, N13,000 for medical science and another N13,000 for law students.

According to di SUG PRO, Comrade Victor Ebibralade, di reduction happun because of di students ogas wey insist say dem must review di fees.

But di students dem no happy wit di agreement wey SUG and management reach. Dem dey tok say di new fees no match di kind facilities wey dem get for school.

Many students for social media platforms complain say dis na di second time wey dem dey increase school fees wey neva tey.

One student wey dem call KpB tok say, "FUO management don increase school fees again, and dis na di second time straight."

Another student, Charles, wey dey 400 level for Sociology, tell tori pipo say di SUG ogas don fail di students with di kind agreement wey dem bring.

Another student, Benny Omini, express im disappointment, e dey call di matter “painful."

E say, "Not again. To think say I choose dis school because di fees dey low. Now, inside one year, dem don increase am twice."

#bayelsa
#PidginNews
#highlights
#Otueke
Our Matter